「迎」媽祖哪會變做「迓」媽祖？

看板TW-language (臺語板)作者ayung03 (熱情)時間14年前 (2012/04/26 10:30)推噓10(10推 0噓 54→)

留言64則, 11人參與討論串1/3 (看更多)

「迎」媽祖哪會變做「迓」媽祖？昨--日是三月廿三媽祖生，人所說：「三--月，痟媽祖。」臺灣一四界攏有人咧迎媽祖，只是迎媽祖這字「迎（ngia5）」--字，這幾年來，有人主張愛共伊正名做「迓」，漸漸就出現了「迓城隍」、「迓火獅」這款新的用字，甚至嘛已經成做真濟新聞媒體或者是大廟寺的官方用語--矣！孔子公講：「必也正名乎」，既然「迓」--字已經濫用甲這款程度，就不得不對聲韻學的角度好好仔來共稽考、稽考。「迓」這字的臺語應該按怎讀？才著，《康熙字典》：「《廣韻》《韻會》《正韻》五駕切《集韻》魚駕切丛音訝《說文》相迎也……」；《彙音妙悟》：「嘉七語」→ga7，「迎也」；《彙音寶鑑》：「嘉七語」→ge7，「迎迓也」，「監三語」→gann3，「迎也泉腔」。根據《康熙字典》所記載這幾若卷韻書的切音，不管是五駕切抑是魚駕切，因為音從訝，所以咱會使共這幾卷韻書的音讀擬做「ga7」。另外，因為泉州腔陰去佮陽去仝音值，而且若佮漳州腔相比--起來，有的音有去鼻化的韻母對應規律，親像歹、耳、鼻、悽、尼遮的例，因此雖然《彙音寶鑑》共泉腔記做「gann3」，事實上，咱猶閣是愛照《彙音妙悟》的記錄共伊讀做「ga7」，而且音值會使讀做五階的「21」，啊若「迓」的漳州腔應該就愛讀做「ge7」。咱閣轉來看「迎」--字，《康熙字典》：「《唐韻》語京切《集韻》魚京切《韻會》疑京切丛音□（按左人右幵）《說文》逢也……」；《彙音妙悟》：「京五語」→ngia5，「接也相（按：應為相接也之誤）」，「卿五語」→ging5，「接也」；《彙音寶鑑》：「驚五語」→ngia5，「迎接迎請迎神也」，「經五語」→ging5，「迎迓迎娶」。暫且不論「ging5」的文讀音，先看「ngia5」這个白話音，音義俱合，正是ngia5媽祖的「ngia5」本字。以上是對傳統的韻書來看「迓」佮「迎」的音讀，簡單來講，就是「迓」雖然嘛是「迎接」的意思，毋拄，「迓」的泉州話愛讀做「ga7」，漳州話愛讀做「ge7」，就是袂使讀做「ngia5」；相對而言，從到今，逐家攏寫甲真慣勢的「迎（ngia5）」--字，毋但意思就若字面上仝款遐爾明顯，而且音讀嘛是上正確--的，也就是「音義俱合」。總講--一句，「迓媽祖」、「迓城隍」、「迓火獅」的「迓」，是望字自生義的現代產物，古早人寫--的「迎媽祖」、「迎城隍」、「迎火獅」、「迎熱鬧」，正是正確的漢字本字。寫於2012.04.15 -- ※ 發信站: 批踢踢實業坊(ptt.cc) ◆ From: 163.21.179.253

推

tokai

04/28 23:44, , 1^F

04/28 23:44, 1^F

→